Málverkasýning í sýndarveruleika
Ég hef á undanförnum mánuðum unnið að þrívíddarlíkani af húsinu sem afi minn, Benedikt Gunnarsson listmálari, og amma mín, Ásdís Óskarsdóttir hjúkrunarfræðingur, áttu. Þau eru bæði látin; afi lést í nóvember 2018 og amma mín rúmum tveimur árum fyrr.
Sýningunni er ekki ætlað að vera yfirlitssýning á verkum afa. Hún endurspeglar hins vegar sérstakt andartak, rétt áður en hringnum var lokað, en það fyrsta sem flutt var inn í húsið voru einmitt málverk afa en húsið var vígt með málverkasýningu hans árið 1967 og verkunum komið fyrir í hverju skoti, rétt eins og við gerðum síðan í mars í fyrra.
Í stað þess að bjóða gestum að koma á staðinn tökum við tæknina í okkar þjónustu og hver og einn getur skoðað sýninguna að heiman frá sér, með eða án sýndarveruleikagleraugna.